電影節喎

六日小姐拿了今年電影節的小(其實而家好大本)册子回家，
說明天就開始郵寄購票，有興趣嗎？

電影節是我還在讀書時候的重頭節目，明明說是郵寄，卻第一日一早親手把表格放進文化中心的信箱（慌死睇少套）
到電影節期間，一日走幾場，由早看到晚，香港九龍來回走，通常都是獨行俠，碰到同學就一塊兒坐。

選片方面，通常都不會選大熱，因為戲院一定會上，但冷門的又不認識，唯有靠那些有時寫得比電影本身還精彩的簡介，和劇照上的男女漂不漂亮來幫忙，反正都是博一博，戲爛都還有些人養養眼。

後來，幸或不幸，越大越忙，發現大部份買了的票都用來做了書籤，再後來，買學生票的資格都喪失了，再後來，我根本不在香港．．．

我變了，而電影節也變了。
現在電影節的選擇，好像再沒有一些“非常無謂”的電影，即無大意義，純粹“拍套戲”，供人“過日辰”但又很有趣的電影，
所以我更無心選擇。

最有印象三甲－

冠軍：<<巴黎的約會>>（法國）－全片由頭到尾拍住一男一女行公園同吹水，一共行了6個公園，而一啲都唔悶，勁啩？

亞軍：<<瘋劫>>(許鞍華)－冇諗過可以喺戲院睇到，張艾嘉索爆，萬子仲係小生，趙雅芝不是柔弱千金小姐，同埋，真係驚！

季軍：<<豬墮井的那天>>（韓國）－嗰時韓風仲未襲港，仲未拍<<生死碟變>>，韓片可算是非常非主流，拍攝手法寫實。套戲講乜完全唔記得，淨係記得戲中啲男人郁吓就打女人，嗰啲唔係劇情嚟，係文化，同佢地食飯用銀筷子一樣，所以好驚，覺得而家啲韓片好假，誠俊哥本來打女人架喎！

仲有其他嘅，不過寫咁多算囉。

越嚟越覺得自己喺度懷愐青春，濕滯。