消防精神 捨己為人 之 死過翻生…

時：06年5月23日, 早上7時28分
地：銅鑼灣某住宅
人：燒屍時嗎，六日小姐

△　清晨時份，不用工作的燒屍時嗎，好夢正酣。
△　忽然｢砰砰砰｣，有人敲門，三份之一秒之後，
有七個男人闖入了屍的房間，
△　屍完全不知道他們如何入屋，完全聽不到任何聲音。
（之後當然知道係開住冷氣瞓到死豬咁梗係乜都聽唔到，
不過有人仲勁）

男甲：小姐，你冇事吖嘛？

屍：　咩事呀？
（仲未醒之餘還未知道那是一群着住制服嘅陌生人）

男乙：你聞唔到嘅咩？

屍：　聞到咩？（不停將人哋啲問題繼續問落去）

男甲：出面嗰個人係你邊位？

屍：　吓？（終於識答）同屋主．．．

男乙：嗱，小姐，你屋企就差啲火燭，有人報咗警，
出面嗰位小姐呢就叫極都唔醒，你最好出嚟睇吓。

屍：　（立刻彈起）哦！

△　所有男人忽然擰開，出房

男甲：　你要唔要攪一陣先呀？

屍：　攪咩呀？我有着衫呀！（我真係有着住條背心裙架。。。）

△ 屍走出房間，終於嗅到超強的煲燶嘢味道，
一團灰雲罩着整個天花。
△ 屍走到客廳，見到沙發上晃如昏迷的六日小姐，
心寒一寒。

屍：　（拍了拍六日的膊頭）喂！

六日：（醒來）做咩？

屍：　做咩？火燭呀！

六日：哎呀！我返嚟想煮嘢食唔覺意瞓着咗呀！

男甲：小姐你有冇覺得唔舒服？

六日：咁又冇．．．

屍：　．．．（唔知講咩好）

男甲：陣間我哋會有救護員上嚟同你check吓。

六日：哦。（呢位小姐全程橫卧喺梳化冇起過身）

眾男：下次小心啲啦，今次好彩有人發現．．．
　我哋唔係爆門架，係撩開度門咋，所以個鎖冇事．．．

屍：　（無地自容）唔好意思，唔該哂你哋，
真係唔好意思．．．（重覆30次）

△ 抄完身份證之後，四個警察加三個消防員徐徐離去。
△ 屋子回復平靜。
△ 屍走進廚房，見煲燶了的煲已被放到洗手盤冷卻。
△ 再走回客廳，見六日小姐再度睡着。
△ 走回自己的房間，看着那團灰灰的雲，那陣火羅味，
不知要多久才會散去。